Дуучин А. Мөнхбат унаж явсан жийпээ мориор сольжээ

“Манай адуу”, “Малчин заяа”, “Насны хань” зэрэг олон сайхан дууны эзэн бол дуучин А. Мөнхбат юм. Хүүхэд байхын спорт, урлагт элэгтэй явсан тэрээр сумын заан цолтой. За бас бодибилдингийн мэргэжлийн тамирчин, багш дасгалжуулагч гэдэг. Харин 2006 онд С. Жавхлан гавьяат “Нутгийн салхи” нэртэй нийтийн дууны уралдааныг зохион явуулсан байдаг. Тэнд “хүчээ үзээд” авсан тамирчин залуу ийнхүү хүүхэд насны хүсэл мөрөөдлөө хөтлөгдөн урлагийн замд хөл тавиад багагүй хугацаа өнгөрчээ. Тэрээр өдгөө СУИС-ийн уртын дууны ангид сурдаг. Өнгөрсөн намар дан морины дуунаас бүрдсэн “Манай адуу” цомгоо гаргаж, бие даасан тав дахь тоглолтоо Монгол бөхийн өргөөнөө тавиад амжсан. Харин энэ удаад “Манай адуу” цомгоо шинэчлэн дахин хэвлүүлэхээр ажилдаа ороод байгаа гэнэ.
Дуучин А.Мөнхбат хурдны өлгий болсон Сүхбаатар нутгийн унаган хүү. Тиймдээ хүүхэд байхын л хурдан морьдын тухай ярианд шимтэн өссөн ажээ. Хэзээний моринд дуртай хүү харин “Манай адуу”, “Үйзэн зээрд” дуугаа дуулснаар бэлэгний олон хурдан адуутай болжээ. Сүүлд гэхэд “Манай адуу” цомгийг нь мялааж Монгол Улсын Тод манлай уяач Г.Батхүү өөрийн шуранхай угшлын адуунаас өнөө алдарт Толин хулын төл болох Толин сартай хул азарга бэлэглэсэн гэж байгаа. Одоо түүний бэлэгний адууны тоо 50 хэдийнэ даваад байгаа ажээ. Байсхийгээд л морь руугаа гүйчихдэг дуучин “сүүлийн үед арай л их мориор өвчлөөд байх шиг” хэмээн өөрийгөө оношлосон нь оргүй биш бололтой. Саяхан тэрээр Дорнодын Цагаан овоогийн уугуул, аймгийн Алдарт уяач Бадамхүүгээс  унаж явсан Ланд 80 машинаараа соёолон үрээ сольж авчээ. Даага, хязаалан, шүдлэндээ дажгүй давхиж байсан энэхүү соёолонг “Манай адуу”-ны эзэн  юм дуулгах хүлэг хэмээн сонжсон нь энэ ажээ. Нэмж сонирхуулахад тэрээр морь уяад хоёр жил болж байгаа. Өнгөрсөн жил Дарьгангын Хутагбалжирын Эрдэнэбаярын бэлэглэсэн алаг соёолон Төв аймгийн Баянцогтын наадамд түрүү, Өвөрхангайн Зүүнбаян-Улааны 80 жилээс айрагт орсон нь шинэхэн уяачид урам зориг нэмээд байгаа юм.