Баяр наадмын албан ёсны хөтөлбөр гарлаа

Ирэх долоодугаар сарын 7-ноос 12-ны өдрүүдэд болох Үндэсний их баяр наадам, Их Монгол Улс байгуулсны 806 жилийн ой, Ардын Хувьсгалын 91 жилийн ойн баярын наадмын хөтөлбөр гарлаа.

Долooдугаар сарын 7-нд Сурын талбайд Урианхай сурын харваагаар эхэлж, 8-нд Буриад сурын харваа, 9-нд хүүхдийн сурын харваа, “Монголын сайхан орноор” уран бүтээлийн үзэсгэлэнгийн нээлт болох юм.

10-нд Хүй долоон худагт хязаалан, шүдлэн насны морьдын уралдаан, Сурын талбайд Үндэсний сурын харвааны нээлтийн ажиллагаа, Сүхбаатарын талбайд Төрийн далбааны өдөрт зориулсан хүндэтгэлийн ёслол, Эзэн Чингис хааны хөшөөнд хүндэтгэл үзүүлэх, жанжин Д.Сүхбаатарын хөшөөнд цэцэг өргөх ёслол болно.

Харин 11-нд Төв цэнгэлдэх хүрээлэнд 11:00 цагаас Төрийн есөн хөлт цагаан тугийг залах ёслолын ажиллагаа болж, Үндэсний их баяр наадам, Их Монгол Улс байгуулсны 806 жилийн ой, Ардын Хувьсгалын 91 жилийн ойн баярын ажиллагааг Монгол Улсын Ерөнхийлөгч Ц.Элбэгдорж нээнэ. Үргэлжлүүлэн Yндэсний их баяр наадмын нээлтийн ажиллагаа тусгай хөтөлбөрөөр явагдах юм байна.

Мөн өдөр хүчит бөхийн барилдааны болон хүүхдийн барилдааны нэг, хоёрын даваа, Үндэсний сурын нэгдсэн үзүүлэх харваа, их насны морьдын уралдаан болж, орой нь Сүхбаатарын талбайд “Улаанбаатарын үдэш” цэнгүүн болон баяр наадмын ёслолын буудлага болно.

12-нд хүчит бөхийн болон хүүхдийн барилдаан, соёолон  насны морьд, дааганы уралдаан, шагайн харвааны шигшээ харваа, сурын харвааны шигшээ харваа уламжлал ёсоор явагдаж, 20:00 цагт Үндэсний их баяр наадмын хаалтын ажиллагаа, Төрийн есөн хөлт цагаан тугийг Төв цэнгэлдэх хүрээлэнгээс Төрийн ордон руу залах ёслолоор наадмын арга хэмжээ өндөрлөнө.