Аймгийн Алдарт уяач Б.Батсүх: 20 гаруй жилийн дараа төрийн наадмаас анхны айргаа хүртлээ

-Төрийнхөө их баяр наадамд азарга айрагдуулсан танд баяр хүргэе. Сэтгэгдлээсээ хуваалцахгүй юу?
-Баярлалаа. Үнэхээр их баяртай байна. Зургаадугаар ангиасаа хойш морь малтай ойр яваагийнхаа хэргийг гаргаж 20 гаруй жилийн дараа төрийн наадмаас анхны айргаа хүртлээ. Сэтгэл хөдлөөд хэлэх үг олдохгүй тулгамдаад байна. Хээр азарганы уяаг МУ-ын Алдарт уяач П.Баяраа найз маань тааруулдаг. Баяраа маань Заамарын наадмын дараа улсад явахыг зөвлөөд, тэр дагуу ирсэн. Найз маань аргагүй мэдрэмжтэй уяач юмаа. Найзаараа бахархаж байна.
-Заамарын наадамд хээр азарга яаж давхисан юм  бэ?
-Арынхаа азарганаас километр шахуу тасарч  түрүүлсэн юм.
-Батсүх Алдарт хэд дэх удаагаа төрийн наадамд хийморио сорьж байна вэ?
-Гурав дахь удаагаа. Хамгийн анх Их Монгол улс байгуулагдсаны 800 жилийн ой буюу 2006  онд хязаалан халтар азаргатайгаа ирж оролцож байлаа. Тэр жил азарга маань улсын наадамд 30 гаргаж давхисан. Тэрний дараа өнгөрсөн жил түүхт 90 жилийн ойгоор ногоон хязаалантайгаа ирж, 46-аар давхиулсан. Харин энэ жил хавчиг хээр азаргатайгаа ирж, төрийнхөө их баяр наадамд айргийн таваар хурдалууллаа.
-Анх удаа төрийн наадмаас айраг хүртэхэд ямар санагдах юм бэ?
-Үгээр хэлэхийн аргагүй баяртай байдаг юм байна. Тэр бүр хүний дэргэд нулимс унагаагаад байдаггүй болохоор  дотроо мэгшиж, нутаг ус, аав ээждээ талархаж явлаа. Азарга Цагаан хөтлийн цаана явахад хээр үрээ маань 11-ээр явж байсан. Тэгэхээр нь дотроо ээж модондоо сүсэглээд залбирч суутал айрагдчихсан.
-Энэ удаа  төрийн наадамд хичнээн насны адуутай ирсэн бэ?
-Уг нь зургаан насанд зургууланд нь уясан ч энд тэнд хуваагдаад улсын наадамд ганцхан хээр азаргатайгаа ирсэн. Баяраа Алдартаар ахлуулсан манайхны хувьд одоогийн байдлаар 56 айраг түрүү аваад байна. Төв аймгийн наадамд л гэхэд хязаалан, шүдлэн, даага түрүүлгэж, гурван мотоцикл авсан. /инээв/
-Батсүх уяач ингэхэд хэдэн оны Алдарт вэ?
 -2006 онд есөн түрүү, 18 айргаар Сэлэнгэ аймгийн Алдарт уяач цолыг хүртсэн.
Ярилцсанд баярлалаа. Таныг хурдан тууртын босоо цагаан хийморь өнөд ивээж явах болтугай.